Девојка на само 25 години дознала дека има рак на дебелото црево, па решила да го сподели своето искуство со сите за да предупреди на можните симптоми.

Кога Ели Вилкок почувствувала остри болки на едната страна од стомакот и ненадејни напади на замор во 2022 година, помислила дека се работи за инфекција на уринарниот тракт. Но, вистинската причина била дијагнозата на рак. Ели имала 25 години кога ѝ бил дијагностициран рак на дебелото црево во четврти стадиум. Таа е една од најтешките болести бидејќи лесно и брзо може да се прошири на други делови од телото, пишува „Дејли мејл“.

Сега, младата Ели, одлучила да ги предупреди сите во своето видео на ТикТок за раните симптоми што ги имала пред да ѝ биде дијагностицирана болеста.

Еден од овие знаци е болката која ја зафаќа само едната страна на стомакот и карлицата, а тоа наведе некои лекари да помислат дека се работи за проблем со репродуктивниот систем.

„Болката беше на левата страна бидејќи туморот ми го нападна дебелото црево. Мислев дека е болка во мочниот меур, а и лекарите мислеа дека е уринарна инфекција“, раскажала Ели.

Потоа додала дека некои лекари мислеле дека има цисти на јајниците и дека тоа е причината за сè. Имала и други симптоми поврзани со рак на дебелото црево. Чувствувала промени со варењето. Имала дијареа и запек, кои наизменично се менувале, а чувствувала и умор.

„После работа дома сакав само да легнам. Бев навистина уморна. Дури и ќе заспијам додека седам на масата“, рекла таа.

Ели забележала и крв во столицата, што е уште еден можен симптом на оваа опасна болест. Таа затоа предупредува дека секогаш треба да се проверува крвта во столицата и да се побара совет од лекар, без разлика дали бојата е посветла или потемна.

„Нема причина да се срамиме. Колку побрзо се испитате, толку побрзо ќе го решите проблемот“, додала таа.

Ели првпат побарала помош за болките во стомакот во април 2022 година. Тестовите за уринарна инфекција биле добри, но тестовите на крвта што ги направила во исто време покажале маркери на воспаление.

Потоа закажала ултразвук, а лекарите очекувале да ѝ откријат цисти на јајниците. Но, болката брзо се влошила, па морала да повика брза помош. Дури кога била направена биопсија, таа ја открила катастрофалната вистина. Дополнителните тестови покажале дека болеста се проширила на црниот дроб, јајниците и мембраната која ги држи органите во абдоменот.

По неколку операции и хемотерапија ѝ било кажано дека нема повеќе траги од болеста.

Сега, Ели е посветена и ги предупредува другите на нејзиниот профил на ТикТок да забележат какви било симптоми на време.

Таа вели дека ракот може секому да му се случи и затоа најважно е како реагираме. Не смееме да се правиме дека нема симптоми и да чекаме да поминат бидејќи раната дијагноза е најдобриот начин за излекување.

@elliewilcock0 Signs and symptoms of bowel cancer for a Thursday ? #fyp #cancer #cancertok ♬ original sound – Ellie Wilcock