Една атракција во Кина, која предизвикува вртоглавица и страв од висина, им овозможува на посетителите да се релаксираат во кревет поставен веднаш до работ на карпа висока повеќе од 100 метри – како што е прикажано во вирално видео кое кружи на интернет.

Оваа необична понуда наречена „Искуство во кревет на карпа“ се наоѓа во Националниот шумски парк Мангшан во градот Ченгџоу, a нејзината цел, донекаде парадоксално, е да се опуштите и да заборавите на секојдневниот живот.

Платформата изгледа како дрвена тераса и е дел од пакетот за авантуристи на отворено. Има дрвен под, мал душек за двајца, јорган и перница, пишува „Њујорк пост“.

Во виралното видео, може да се види жена како ги испружува рацете во целосна смиреност додека камерата се движи кон прекрасниот планински пејзаж во позадина. До креветот има дури и место за шолја кафе и чевли.

Иако името вели „кревет“, оваа атракција не е наменета за спиење, туку за опуштање и секако за фотографирање.

Се чини дека добро ја исполнува својата цел. „Не беше ни приближно толку страшно како што очекував“, рече еден љубопитен, гладен за адреналин посетител. „Беше забавно околу половина час – најмногу поради сликите и необичното искуство.“

Секако, да се биде на работ на карпа не звучи многу безбедно, но посетителите се обезбедени со безбедносен појас што се прицврстува на карпата.