Момче и девојка од Кичево, на возраст од 22 и 21 година, се жртвите во сообраќајната несреќа која се случи утрово на патот Кичево-Охрид, кај селото Ботун.

Полицијата претходно соопшти дека на автопатот во изградба, кај девијацијата „Царо поле“, атар на селото Ботун, општина Дебрца, автомобил „Ауди“ со кичевски регистарски ознаки излетал од патот и паднал во река.

Констатирано е дека Ф.К.(22) возач на возилото и сопатничката Е.С.(21), двајцата од Кичево, починале на местото на настанот, а смрт констатирал лекар од Итната медицинска помош од Охрид. Увид на местото извршија јавен обвинител, сообраќаен вештак и полициски екипи.

По наредба на јавен обвинител, врз телата на починатите ќе биде извршена обдукција.