Но новото вето од Бугарија, нема простор за еврооптимизам со СДСМ и ДУИ на власт. Македонија е длабоко влезена во слепа улица, констатира лидерот на ВМРО-ДПМНЕ Христијан Мицкоски на денешната прес конференција.

– Предвремените избори не се секогаш најдоброто решение, но во состојба кога е јасно дека постојат сериозни проблеми, кога нема начин ниту пак било каква шанса оваа Влада нешто да промени, кога генерации повторно се оставени конечно да чекаат пред портите на ЕУ, предвремените парламентарни избори се единственото решение за излез од оваа политичка, економска, енергетска, дипломатска, сеопшта криза во државава, рече Мицкоски.

Тој предлага да се формира техничка влада во февруари – март, и брзи предвремени избори во мај-јуни за излез од кризата во која е државата по најновото вето на евроинтеграцискиот процес од страна на Бугарија.

-Само така ќе се избориме за нова иднина, Македонија сега се движи во погрешна насока, дециден е Мицкоски.

Тој оцени дека во земјава е потребен „нов импулс, нова сила за реформи, една заедничка платформа, обединување околу нов договор со народот, за работите кои му се важни на народот”.

– Ова е отворен апел до власта за брзи избори, како единствено решение за излез од политичката и економска криза и наша обврска за борба за нова иднина кон која сите заедно се имаме обврзано. Воедно барам и општествена поддршка на поединци и општествени групи да го поддржат овој наш предлог за избори, да не губиме ниту месец повеќе, затоа што така ќе направиме и општествена мобилизација, силен активизам, додаде Мицкоски.

-Бидејќи Пендаровски бара 61 потпис да застанеме со 61 потпис позади името на Африм Гаши и тој наместо Димитар Ковачевски да биде идниот мандатар бидејќи велеше дека единствена причина заради која ја поддржува влада е да не го кочи евроатланскиот процес кој гледаме дека е закочен. Потоа гледам дека си најде нова причина, а тоа да ги реши економската и енергетската криза, изјави претседателот на ВМРО-ДПМНЕ, Христијан Мицкоски на денешната прес конференција одговарајќи на новинарско прашања на тема Албанец премиер.

Мицкоски тоа го посочи и како одговор на обвинувањата на соработникот на Али Ахмети во јавноста дека ВМРО-ДПМНЕ прифатила Албанец технички премиер на владата.

– Ние одговоривме дека ова не треба да се третира како етничко прашање, туку како прашање на компетенции и вештини, и дека ние немаме никаков проблем да подржиме ако определена личност која ги поседува компетенциите и има план и визија да работа за добро на сите граѓаните. Ако таквата личност биде предложена од најголемата партија во парламентот, а тоа е ВМРО-ДПМНЕ и ако биде Албанец, очекуваме ДУИ да го поддржи, но стигна реакција од ДУИ дека тие ќе поддржеле ако ВМРО-ДПМНЕ победи на избори и предложи Албанец.

Тоа можеме да го видиме ако се охрабрат и излезат на избори, рече Мицкоски додавајќи дека еве им можност и на Гаши да се покаже но и ДУИ и Али Ахмети да го поддржат него наместо Ковачевски за мандатар на владата.