Холивудскиот актер Метју Меконахи откри дека ја одбил една од најголемите понуди во својата кариера, вредна 14,5 милиони долари, затоа што повеќе не сака да глуми во романтични комедии.

Во гостување во подкастот „The Diary of a CEO“, 55-годишниот актер објасни дека се повлекол на својот имот во Тексас кога сфатил дека Холивуд не сака да му понуди улоги во драми, и покрај тоа што бил подготвен да прифати и значително помал хонорар.

„Глумејќи во такви улоги добивав квантитет, но не и квалитет. Она што сакам да го работам се драми, но Холивуд не сака да ми ги понуди. Тогаш му реков на мојот агент: ‘Нема повеќе романтични комедии’“ изјави Меконахи.

Актерот откри дека неодамна, по двегодишна пауза, повторно му била понудена улога во романтична комедија. Прво му биле ветени осум милиони долари, потоа десет, па дванаесет, сè додека конечно не дошла понуда од 14,5 милиони.

„Кога ја видов последната понуда, реков: ‘Дајте ми да го прочитам сценариото повторно’. Го прочитав, а тоа беа истите зборови како во претходната понуда од осум милиони што ја одбив, само што беше подобро напишано“, раскажа Меконахи.