Медицински хеликоптер се урна на прометниот автопат 50 во Сакраменто, Калифорнија, откако доживеа „вонредна состојба во воздух“. Несреќата се случила вчера околу 19 часот по локално време, при враќање на леталото кон базата по транспорт на пациент во болница, објави британски Метро.

Хеликоптерот од непознати причини почнал нагло да губи висина и се урнал на средината од автопатот, блокирајќи ги двете ленти во насока кон исток. При падот критично се повредени три лица, а една од жртвите останала заробена под леталото.

Херојска акција на спасување

Мала екипа од локалната противпожарна служба, заедно со возачи кои се затекнале на местото на несреќата, успеале да го подигнат хеликоптерот и да ја ослободат заробената личност, која веднаш била пренесена со амбулантно возило.

Капетанот на противпожарната служба на Сакраменто, Џастин Силвија, изјави дека е вистинско чудо што никој од учесниците во сообраќајот не е повреден.

„Луѓето пријавија дека го виделе хеликоптерот како нагло паѓа, по што целиот сообраќај се забави“, рече тој.