Неколку илјади членови и симпатизери на опозициските партии во Република Српска вечерва се собраа во Бања Лука на масовен протест против, како што наведуваат, „изборната кражба“ што се случила на гласањето на општите избори во неделата.

„Сакаме на мирен начин да покажеме дека не се согласуваме со изборна кражба и менување на изборната волја на граѓаните“, рече претседателот на Партијата на Демократски напредок (ПДП), Бранислав Бореновиќ пред почетокот на протестниот марш.

Претставниците на опозицијата најавија дека бараат од Централната изборна комисија на БиХ повторно да ги преброи гласовите во цела Република Српска за претседател на Република Српска, Претставничкиот дом на Парламентот на БиХ и Националното собрание на РС. Тие обвинуваат дека изборите поминале во знакот на масовни нерегуларности и сомнителни случувања: повеќе од 32.000 неважечки гласачки ливчиња, голем број нерегуларности во Добој, Зворник и Приједор и насекаде низ Република Српска, појава на „слепи“ лица, покажувачи, исфрлање набљудувачи од избирачкото место, како и промени на записниците.

И актуелниот претседател на Република Српска, Милорад Додик и неговата противкандидатка, Јелена Тривиќ прогласија победа во претседателската трка.

„Сосема е јасно дека ова е прекршување на изборната волја, особено на изборите за претседател на РС. Има 35.000 неважечки ливчиња, повеќе од 20.000 гласови се во корист на кандидатот на СНСД Милорад Додик во Добој, Зворник и Приједор, на десетици избирачки места каде нашата кандидатка Јелена Тривиќ има нула гласови, што е целосно нереално“, рече Бореновиќ.

Според него, „изборната кражба е огромна“: од 70 илјади до 100 илјади гласови.