Македонската кошаркарска сениорска репрезентација ја забележа и четвртата победа во претквалификациите за ЕП 2025 откако во салата „26 Април“ во Гевгелија со резултат 74:71 по едно одиграно продолжение ја совлада Данска. Во регуларните 40 минута беше 64:64.

Крајно возбудлив натпревар во кој Данците се покажаа како доста незгоден ривал, погодуваа кога беше најпотребно искористувајќи ги нашите нереализирани напади.

Водеа гостите во поголемиот дел од мечот, во првата четвртина имаа водство од 9:17, а во втората четвртина неколку пати дури имаа и двоцифрена позитива од „плус 11“ (14:25, 16:27, 21:32). Успеавме да анулираме половина од негативата за на пауза Данска да води само со 32:37.

Ништо не се промени и во третата четвртина каде исто така Данците го контролираа резултатот, пред стартот на последните 10 минути имаа 45:54, па намаливме со тројка на Мекиќ кој реализираше од пола на терен за ерупција на трибините.

Навивачите ја даваа потребната поддршка, дефинитивно замената за Димитријевиќ, Американецот Ти Џеј Шортс се покажа како одлично решение кој во текот на целиот меч го водеше тимот. Успеавме целосно да се вратиме и со поените на Шортс да израмниме на 64:64.

Во екстра-времето, отворивме фантастично. Со четири поени по ред, но Данците вратија со шест за нивно водство од (70:68). Слободните фрлања ни правеа проблеми, Шортс промаши едно на нешто повеќе од минута пред крајот, при резултат 69:70. Данска, за среќа, не го искористи својот напад…

Во следната акција се случи можеби клучниот момент. Шортс беше фаулиран од Дарбо во обид да погоди тројка, и доби три слободни фрлања. Овојпат ги погоди сите три (72:70) и многу поповолна ситуација за нас. Данците имаа 24 секунди, фаулиран беше Зохоре кој погоди само еднаш од линијата, па на седум секунди пред крајот Шортс стави точка на драмата во Гевгелија.

Шортс запиша 33 поени (шест асистенции), следен од Ѓуроски со 11 поени (шест скокови), а на спротивната страна Дарбое имаше 21 кош, седум скокови и 10 асистенции, додека Јукиќ забележа 13 поени и пет скокови.

Во нашата група „Д“ Словачка триумфираше на гостувањето кај Норвешка со 56:68. По четири кола води Македонија со осум бодови, пред Норвешка и Словачка кои имаат по шест, а последна е Данска со четири.

Следниот меч избраниците на селекторот Александар Јончевски ќе го имаат на гостински терен на 23 февруари 2023 година против селекцијата на Словачка.