Пејачот Мики Секуловски (36), кого домашната публика го запозна со учеството во „Македонски идол“, сега полека го освојува регионот со импресивните настапи на музичкото натпреварување „Ѕвездите на Гранд“.

Под менторство на Светлана Ражнатовиќ – Цеца, тој во последното издание на шоуто се претстави со песните „Након свих ових година“ на „Бијело дугме“ и „Алфа Ромео ГТА“ на Дадо Топиќ.

Стручното жири, составено од Александар Милиќ – Мили, Ана Бекута, Драган Стојковиќ – Босанац, Марија Шерифовиќ, Снежана Ѓуришиќ, Вики Миљковиќ и Ѓорѓе Давид, му даде шест гласа од можни седум.

„Досега имаше повеќе рок изведувачи на оваа сцена, но ти си далеку најдобар од сите кога станува збор за таа музика“, искоментира Шерифовиќ.

Ѓорѓе Давид, пак, стана од своето столче и го прегрна нашиот натпреварувач, покажувајќи го своето восхитување.

Тој пееше во дуел со 17-годишниот Инел Нукиќ, за кого жирито искоментира дека „немал среќа“, бидејќи му се паднало да се натпреварува со искусниот Секуловски.