Приштинскиот адвокат Арианит Кочи денес донесе четири магариња во косовското собрание, протестирајќи против блокадата на конституирањето на парламентот. Кочи рече дека магарињата биле донесени од Исток, пренесува Б92.

„По пресудата на Уставниот суд, утврдив кој е виновен, тоа е Албин Курти“, изјави Кочи пред новинарите.

Во исто време, тој ги критикуваше другите партии претставени во косовскиот парламент дека не се подготвени да придонесат за прекинување на сегашниот ќорсокак. Тој нагласи дека не сака да биде фактор на поделба, туку на единство.

„Можеби ваков вид блокада им одговара“, рече Кочи.

Според „Коха“, тој протестира веќе неколку недели поради застојот во работата на Собранието.

Десетици претставници на граѓански организации и невладини организации ги продолжија своите протести и денес пред зградата на косовското Собрание, барајќи итно конституирање на законодавното тело, објавија приштинските медиуми.

Констутитивната седница на Собранието на привремените институции на Приштина денес беше прекината по 41-ви пат, откако повторно не беше усвоен предлогот на Самоопределување за одржување тајно гласање за избор на претседател на Собранието.