Грозно е чувството што пријавив злоупотреба тешка 2,2 милиони евра во Агенцијата за европски образовни програми и мобилност, а потоа јас седнав на обвинителна клупа за наводна злоупотреба на службената положба, вели во интервју за „Слободен печат“ Лидија Димова, поранешна директорка на Агенцијата.

Она што беше најболно во целата работа беше што во моментот кога ме линчуваа и распнуваа, половината од владата беа мои луѓе. Луѓе кои мене многу добро ме познаваат и дозволија тоа да се случи. Тие го измолчија тоа што ми се случи и тоа покажува дека устата ни е полна со „европски вредности“ ама ако ни е згодно немаме проблем некого да зезнеме, рече Димова.

Таа во интервјуто се осврнува на годините без поддршка од пријателите и луѓето кои ја поставиле на раководна позиција, како и за фактот што како што вели – ја спасила Агенцијата од тоа да плаќа по 6 илјади евра месечно за кирија за службените простории, за што заработила обвинение.

-Го опремивме новиот простор и го брендиравме за да биде видлива Националната Агенција и практично заштедив многу пари. Претходно плаќавме кирија за претходниот простор. Знаете колкава? Шест илјади евра месечно за 150 квадрати! Просторот на наем го даваше Гуштеров, со него беше склучен договорот. И сега Јавното Обвинителство не вели „благодариме многу што ни заштеди пари од буџетот да не одат на кирија“, туку вели дека сум ги злоупотребила европските пари. А ОЛАФ (Европската канцеларија за борба против измами) вели дека не се злоупотребени, рече Димова во интервју за „Слободен печат“.

Димова додаде дека од првиот ден е распната, има забрана за вршење дејност, а тие луѓе кои биле во нејзиниот тим во Агенцијата со кои ја откриле злоупотребата од 2,2 милиони евра за кои ОЛАФ бара Македонија да ги врати – сите или се отпуштени, или им се врши мобинг.

Од првиот ден сум распната дека сум виновна од сите, мене ми е забранета дејност. А фирмите за кои утврдив злоупотреба од 2,2 милиони евра кои ОЛАФ бара да се вратат, немаат никаков проблем. А јас не смеам да работам. Секој понеделник се пријавувам во суд заедно со куп други криминалци. А овие пријавените се први пријатели со политичките страни и од едната и од другата страна. Немаат проблем. Тие што ме поставија се сетија да ми ја затворат устата, бидејќи сум непослушна. За мене во партијата се користеше терминот дека сум „ризична“ и „товар“ и така се однесуваше СДСМ кон мене, изјави Димова. 

Таа додаде дека откако ја открила злоупотребата, ги замрзнала парите кон фирмите што биле инволвирани во злоупотребите.

Нола Исмајлоска Старова и Зоран Заев ме викнаа во седиштето на СДСМ и од мене се побара да ги пуштам парите кон првопријавениот од мојата кривична пријава, а и да ја повлечам пријавата, рече Димова.

Димова истакна дека за жал нејзиното име се поврзува со „тренирање магариња“, за што кажа дека е медиумски конструиран случај, односно случај монтиран за да ѝ се нанесе штета по угледот, како и спин со цел да се оцрни нејзиното име, бидејќи проектот за кој биле доделени парите воопшто не се однесувал на тренирање магариња и подоцна добил и награда, за која немало ниту еден новинар да извести.

Проектот со „тренирањето магариња“ бил всушност проект за посета на училиште во Хрватска со цел да се научи како да се употребува магарешкото млеко, да се прават сапуни и тоа како дел од образовни цели, а за доделувањето на парите таа немала никаков удел ниту улога.

Поранешната директорка на Агенцијата Димова, во детали објасни како пред 4 години почнала внатрешна истрага до која дошла до фрапантни сознанија за 2,2 милиони евра злоупотреба на европски пари од „Еразмус Плус“ програмата, за кои сега ОЛАФ барa Македонија да ги врати назад.

За ова Димова доставила пријава освен до Европската Комисија и до Јавното обвинителство Скопје.

Јавното обвинителство Скопје, четири ипол години е во предистрага, а ОЛАФ ја заврши својата истрага и бара парите што се злоупотребени а Димова ги пријавила, да бидат вратени. Рокот за враќање тече, а во земјава никој не е осомничен, обвинет ниту осуден за нив. Медиумот „Нота“ објави дека првопријавениот од кривичната пријава што Димова ја поднела, уште добива пари од Агенцијата преку „Еразмус Плус“ програмата.

-Почнав да истражувам. Веднаш сфатив дека сите од Македонија оделе на размена во 5 места во Европа. Тоа беше многу чудно. Кога видов дека голем дел од парите одат на исти места, во „братството и единството“, пријавив во Брисел.  Почнавме да одиме во проверки во Бугарија во хотелите каде се правеа настаните. Утврдивме двојна злоупотреба. На пример, во еден ист хотел се случуваат истовремено 3-4 настани од „Еразмус“, еден финансиран од македонската Национална агенција, другиот од бугарската. Се извлекуваат пари од две национални агенции за еден ист настан. Поразително беше што сфатив дека 70 проценти од вкупниот буџет на Македонија се слева во само две организации. Самата кривична пријава има 23 лица, училишта, факултети, меѓутоа главната измама се состои во тоа што две фирми пишуваат проекти на сите овие ентитети, тие се одобруваат од Националната Агенција преку нивни евалуатори, па парите одеа во училиштата, кои пак на јавни набавки ги доделуваа овие пари во целост, до денар на двете фирми. Практично, парите наместо да завршат во некое училиште, завршуваа кај овие два економски оператори, изјави Димова.