Британија денес се сеќава на нападите во Лондон од 7 јули 2005 година, при што кралот Чарлс ги повика граѓаните да останат обединети „против оние кои би сакале да нè поделат“, а премиерот Кир Стармер нагласи дека Британците „биле обединети тогаш и се обединети сега“.

Утрото на 7 јули 2005 година, четворица британски исламисти, инспирирани од Ал Каеда, детонираа експлозивни направи во три возови на метрото и во двокатен автобус за време на шпицот во центарот на Лондон, при што загинаа 52 лица, а беа повредени повеќе од 700.

Дваесет години подоцна, „со длабока тага размислуваме за 52-та невини луѓе кои беа убиени во овие бесмислени дела на зло и континуираната болка на нивните роднини“, нагласи кралот Чарлс во соопштението.

„Духот на единството беше она што им помогна на Лондон и на нашата нација да заздрават“, додаде тој, додавајќи дека нападите ја покажаа важноста на „градењето општество каде што луѓето од сите вери и потеклo можат да живеат заедно со меѓусебно почитување и разбирање“.

Metropolitan Police commissioner Sir Mark Rowley reflected on the lessons learned since the deadly terror attacks in London on 7 July 2005.

Read more ➡️ https://t.co/RPoINa6NvX pic.twitter.com/YsglXERRbD

— Sky News (@SkyNews) July 6, 2025

„Оние што се обидоа да нè поделат не успеаја. Бевме обединети тогаш и сме обединети сега против омразата и за вредностите што нè дефинираат: слободата, демократијата и владеењето на правото“, рече Кир Стармер.

Британскиот премиер оддаде почит на „храброста на службите за итни случаи, силата на преживеаните и единството на Лондончани во лицето на теророт“.

Денес во Лондон се планирани неколку комеморативни служби, вклучувајќи и служба во катедралата „Свети Павле“.

Министерката за внатрешни работи Ивет Купер изјави за „Сандеј Мирор“ во неделата дека исламистичкиот и десничарскиот екстремизам остануваат „најголемите закани“ за Велика Британија денес.