По повод 150 годишнината од раѓањето на најголемиот македонски деец и револуционер Гоце Делчев Државниот архив на РС Македонија направи пригодна изложба со материјали за него кои се чуваат во оваа државна институција.

-Архивот ги собира, чува, проучува историски значајни документи кои се оригинални и кои се однесуваат на нашата историја култура и традиција. Тој го оправдува епитетот дека е еден од главните столбови на нашата култура и идентитет. Изложба по повод 150 годишнина од раѓањето на Гоце Делчев беше составена оа материјали кои се чуваа во депота на Архивот во Скопје, депото во Штип каде Гоце Делчев бил учител во Ново Село, има доста материјали и во тоа одделение. Инаку Архивот има 9 депоа. Мислам дека одбележувањето беше достојно. Имавме 1о големи паноа.  Претседателот Стево Пендаровски беше покровител на оваа изложба и тој се осврна со многу поучни пораки за актуелните односи со Бугарија но и на значењето на Гоце Делчев во нашата историја, рече Емил Крстески, директор на Државниот архив на РСМ.

Според директорот Крстески на изложбата се презентирани над 40 оригинални писма пишувани од Гоце Делчев, потпишани со псевдонимот Ахил, до негови пријатели и соборци, а има и пано посветено на неговите соборци со кои соработувал.

-Внуката на Гоце, Велика Чопова Јурукова, во 1984 година ни ја достави целата семејна архива врзана со Гоце кои треба да ги чуваме и ние како Државен архив сме главни темели на нашиот национален идентитет, вели тој.

Изложбата посветена на 150-годишнината од раѓањето на Гоце Делчев ќе патува низ градовите на државата каде Архивот има депоа: Штип, Велес, Битола, Прилеп и Охрид за да можат луѓето да се запознаат со интересни детали и нови моменти кои ги има на таа изложба, рече Крстески додавајќи дека изложбата ќе биде презентирани во Нови Сад во Архивот на Војводина, како и во Загреб, Љубљана, Берлин, Париз каде се преговара со Меѓународниот архивски совет, што е добра промоција на македонската култура во европските земји

Крстески се осврна на акцијата која ја спроведува Архивот која е своевиден повик до граѓаните да ги отстапат на Архивот важните историски документи кои ги имаат во приватните архиви.

-Приватни иматели ни носат документи од дедовци и прадедовци кои се значајни за истражување. Луѓето не знаат каква вредност за државата поседуваат. Кога ќе ни ги отстапат трајно да бидат зачувани во државниот архив. Таков апел упативме и до македонската дијаспора зошто и тие имаат вредни материјални за нашата историја, рече Крстески додавајќи дека ваков повик имало и пред 2 години.

Крстески напомена дека кога пред 3 години стапил на функцијата директор на оваа национална установа, објектот го затекнал во многу лоша состојба.

-Зградата од надвор е претставителна со столбови. Но не е градена по никакви стандарди за Државен Архив, нема заштитено депо, нема простор за лабораторија, за заштита на материјали, канцеларии без прозорци без воздух, а се работи со стари книги. Одржувањето е предизвик заедно со дигитализацијата за, и на таков начин да се зачуваат вредните документи. Оваа проблематика си бара и специфични услови. Една солуција е Државниот архив да се врати во старата зграда каде има соодветно депо но не е средено, рече Крстески во гостувањето во Утрински брифинг.