Денеска на „Јохан Кројф“ Арената во Амстердам се одигра првото осмифинале на Европското првенство, Данска убедливо славеше со 4:0 против Велс.

Во првото полувреме Данците водеа со 1:0 благодарение на погодокот на Долберг во 27 минута после асистенцијата на Дамсгаард.

Долберг по вторпат се запиша во листата на стрелците на стартот од вториот дел (48`), а во финишот уште двапати се затресе велшката мрежа.

Во 88 минута Маеле се погрижи за трет погодок на данската селекција, 120 секунди подоцна Велс остана без еден играч на теренот поради црвениот картон на Вилсон.

Во судиското надополнување (90+6) Брајтвајт го постави конечниот еполог за голема радост на Данците кои повторно се четвртфиналисти на континенталните собири за првпат од 2004 година.

Данска во четвртфиналето ќе игра со победникот од дуелот Холандија – Чешка, а овој меч е закажан в недела на стадионот во Будимпешта.