Премиерот Димитар Ковачевски кој е во работна посета на Словенија, по повод Бледскиот статешки форум, вечерва присуствуваше на работна вечера што ја организираше неговиот словенечки колега Роберт Голоб, информираат од прес-службата на Владата.

На вечерата беа присутни и претседателот на Европскиот совет, Шарл Мишел, како и премиерите на Албанија Еди Рама, на Хрватска Андреј Пленковиќ, на Бугарија Николај Денков, на Косово Албин Курти, на Србија Ана Брнабиќ, на Црна Гора Дритан Абазовиќ и претседателката на Советот на министри на Босна и Херцеговина, Борјана Кришто како и вицепремиерката и министерка за надворешни работи на Словенија, Тања Фајон.

Благодарност до мојот колега Роберт Голоб за поканата и можноста за отворен и конструктивен разговор што го имавме за време на работната вечера во пресрет на отворањето на Бледскиот стратешки форум – напиша Ковачевски на неговиот Фејсбук профил.

Тој истакна и дека ова било можност уште еднаш да се потврди важноста на евроинтеграцијата на Западниот Балкан, како и дека напредокот на земјите од регионот за ЕУ е исклучително важен.