Кетрин, принцезата од Велс, вечерва ѝ сподели на јавноста дека ѝ е дијагностициран рак на 42-годишна возраст и дека оди на „превентивна“ хемотерапија.

Принцезата ѝ се обрати на јавноста со емотивна видеопорака, во која откри дека дијагнозата „го вознемирило целото нејзино семејство“ и дека таа и Вилијам „прават сѐ што можат приватно да ја решат ситуацијата поради семејството“.

„Ни требаше време да им објасниме сè на Џорџ, Шарлот и Луис, на начин што им одговара, и да ги увериме дека ќе бидам добро“, додаде таа во видеото снимено во семејната градина.

„Јас сум добро и станувам сѐ посилна секој ден со тоа што се фокусирам на нештата што ми помагаат да заздравам – во умот, телото и духот. Тоа што го имам Вилијам покрај мене е, исто така, одличен извор на удобност и сигурност. Такви се и љубовта, поддршката и добрината што многумина од вас ми ја покажаа. Сѐ тоа ни значи и на двајцата“, продолжи принцезата.

Ракот ѝ бил откриен дури откако таа беше подложена на операција на абдоменот во клиника во Лондон во јануари. Од Кензингтонска палата соопштија дека нема да објавуваат детали за тоа каков тип рак има принцезата или во која фаза е ракот и побара од јавноста да не шпекулира.

Во моментов, и британскиот крал Чарлс Трети се лекува од рак.

Да потсетиме, принцезата од Велс последен пат беше видена во јавноста на 25 декември, а палатата Кенсингтон на 17 јануари објави соопштение со кое на јавноста ѝ соопшти дека Кејт била подложена на „планирана операција на абдоменот“ во клиника во Лондон.

Нејзиното ненадејно исчезнување од јавноста, како и тајноста поврзана со нејзината здравствена состојба, вознемири многумина, а на социјалните мрежи почнаа да се шират разни теории на заговор за причините за нејзиното исчезнување.