Денеска во Даут Пашин Амам ќе се одржи панел дискусија на која во фокусот ќе биде промена на општеството преку уметност, по што ќе следи и изложба насловена: Скопје низ моите очи, во организација на невладината организација „Ај“ (EYE). Основачот на организацијата, Дорина Ајдини денеска во Утрински брифинг нагласи дека станува збор за ентузијастички проект на кој се работело повеќе месеци.

– На панел дискусијата ќе бидат фотографот Осман Демири, актерката Сабина Мемиши и графит дизајнерот Наим Идризи. Повикот за панел дискусијата и за самата изложба беше објавен на социјалните мрежи, повикот е отворен за сите заинтересирани граѓани. Проектот започна уште во август а во октомври беше направена работилница со четири предавачи кои предаваа за фотографија, новинарство и активизам. Работилницата беше насочена кон промената во општеството која може да се постигне преку фотографиите. На околу 20 млади луѓе им беше дадена задача да направат фотографии и да покажат како низ нивните очи го гледаат Скопје. Најубавите слики беа изложени во Котор а за првонаградената следуваше интензивен курс за фотографија, вели Ајдини.

Со денешната изложба се заокружува повеќемесечниот проект. Изложбата ќе биде поставена само еден ден и тоа од периодот од 19 до 20 часот.