Бугарската полиција пронајде 18 мртви тела на мигранти во напуштен камион во село во близина на главниот град Софија, соопшти бугарското Министерство за внатрешни работи.

„Според првичните информации, камионот превезувал илегални мигранти – вкупно околу 40 лица, кои се криеле на скриено место под транспортирани дрва“, соопшти бугарското Министерство.

Според првичните информации, мигрантите починале од задушување, а преживеаните, од кои повеќемина биле во тешка здравствена состојба се премрзнати, прегладнети и дехидрирани. Тие веќе се пренесени во болница.

Во поголемите болници во моментов се примени 11 лица, изјави в.д министерот за здравство Асен Меџидиев. Во другите медицински установи според него ќе бидат сместени останатите, кои се во полесна состојба, објави БНТ.

“Во 17.00 часот на Итната помош на Военомедицинската академија биле донесени пет лица. Тие се сместени на интензивна нега, а четворица од нив се во тешка состојба и бараат интубација“, соопштија од ВМА.

Според информациите на Бугарската национална телевизија (БНТ), мигрантите требало да бидат префрлени од бугарско-турската граница до бугарско-српската граница.

Во тек е потрага по трговците со луѓе за кои се верува дека го управувале камионот и избегале, потврдија властите. Се верува дека тоа е најсмртоносниот инцидент со мигранти во земјата. Бугарија, која се наоѓа на надворешните граници на Европската унија, се обидува да ги заостри безбедносните мерки за да го спречи зголемениот број луѓе кои сакаат да ја преминат границата.