Јапонскиот оперски пејач Казухиро Котецу веќе некое време е популарен на социјалните мрежи со свои извонредни изведби на македонски песни.

За неговиот интерес за македонската народна музика делумно е заслужен и нашиот оперски пејач Благој Нацоски, со кого Казухиро соработувал во минатото и кој воедно му ја доближил магијата на македонскиот мелос.

Казухиро Котецу ја воодушеви јавноста со многуте изведби на песни од македонската народна музика како „Македонско девојче“, „Болен ми лежи Миле Поп Јорданов“, „Ако умрал ил загинам“, „Земјо македонска“ и многу други.

Котецу е познат јапонски уметник, кој воедно е и дел од операта во Токио, но покрај своите професионални ангажмани, голем дел од своето време го посветува на истражување на богатата македонската народна музика од која и самиот е воодушевен и дава сè за да ја пренесе на свој, уникатен начин.

Останатите негови изведби можете да ги слушнете на неговиот „Јутјуб“ канал – „Tokyo Opera“.