Поп-ѕвездата Аријана Гранде искрено зборуваше за своето ментално здравје во триминутно видео на ТикТок.

Пејачката ја употреби платформата ТикТок за да ја раскаже својата приказна за менталното здравје, адресирајќи ги неодамнешните коментари за нејзиниот физички изглед.

„Не го правам ова често. Не ми се допаѓа. Не сум добра во тоа. Но, сакав само да се осврнам на вашите грижи за моето тело и малку да зборувам за тоа што значи да се биде личност со тело кое се гледа јавно и му се посветува толку големо внимание“, започна пејачката.

„Постојат многу различни начини да изгледате здраво и убаво. И лично, за мене, телото со кое го споредувате моето сегашно тело беше најнездравата верзија од мене“, продолжи таа. „Бев на многу антидепресиви, пиев додека бев на нив и јадев лошо. Во најлошиот момент од мојот живот изгледав како што на вас ви изгледам здраво, но тоа, всушност, не беше моето здраво тело“.

Зборувајќи понатаму, пејачката добитничка на Греми додаде дека иако нема потреба да зборува за нејзините здравствени проблеми, нешто добро може да излезе од тоа што е отворена и ранлива.

„Здравото може да изгледа поинаку“, продолжи Гранде.

„Втора работа е тоа што никогаш не можете да знаете низ што поминува некој, па дури и да изгледа како да е во добра состојба, можеби работи на себе или има систем за поддршка со кој работи на тоа. Никогаш не можете да знаете, затоа бидете нежни со себе и едни со други“, додаде Гранде.

Таа упати и убави зборови до своите фанови: „Прекрасни сте без разлика во која фаза сте. Ви праќам многу љубов и мислам дека сте убави без разлика низ што поминувате, без разлика каква тежина имате, без разлика како сакате да се шминкате овие денови, без разлика какви козметички процедури сте направиле или не“, изјави Гранде на крајот од видеото.

„Само мислам дека сте убави и сакав да споделам чувства. Имајте многу убав ден, ви испраќам многу љубов“.

Аријана Гранде моментално работи на филмска адаптација на мјузиклот на Бродвеј, „Wicked“.

@arianagrande♡♬ original sound – arianagrande