Ивана Стаменковска е млада, амбициозна девојка и веќе успешна во две различни професии, кои еднакво ја исполнуваат и им се посветува со истиот жар и желба за задоволни клиенти. Ивана е ветеринарен лекар и инструкторка по јога, а од искуството со работата меѓу луѓето и животните, таа вели дека полесно комуницира со животните. Во „Утрински печат“ Ивана зборуваше за своите професионални предизвици и љубовта кон двете различни професии кои успешно ги балансира.

„Никогаш не можам да кажам што сакам повеќе, тоа е факт. Сосема е различно кога ќе влезам во болница, а сосема е друго чувството кога ќе отидам во студио. Ветеринарството ми е професија, односно нешто што го сакам од кога бев мала, а љубовта кон јогата се роди во текот на животот. Малку ми е тешко да кажам кога точно почнав со јогата, мислам дека беше 2017 година кога бев во САД. Почнав пред работа да практикувам некои вежби, се истегнував, гледав видеа на Јутјуб и се информирав за часови по јога. Во тој момент не знаев што е тоа јога, кога дојдов дома, пронајдов обука за учители по јога и решив дека сакам да пробам и да научам повеќе за тоа. Така почна сѐ, ја завршив обуката и веднаш почнав да држам часови и еве веќе шеста година успешно работи моето студио со часови по јога, онлајн часови и разни програми“, вели Ивана.

Иако во денешно време повеќето од луѓето ја практикуваат јогата како тренд, Ивана вели дека тоа не ги намалува придобивките од самото вежбање. На крајот од денот е важно секој што ќе дојде во нејзиното студио, оттаму да си замине задоволен и релаксиран.

„Сега јогата е во тренд, повеќе е модерно да одиш на јога отколку што е важно самото вежбање. Но, супер е, сѐ додека луѓето доаѓаат во сала, се појавуваат. Тие, пред сѐ, доаѓаат за себе, најважно е да вежбаат, така што јас сум среќна, тие се среќни, без оглед на тоа дали е тренд или не. Има и психички и физички придобивки од јогата, јас практикувам атлетски тип јога, тоа се повеќе вежби за целото тело, иако имам и делови за медитација и дишење. Целта на моите часови е да дојдеш, да се испотиш, да се релаксираш и да си отидеш дома“, вели Ивана за своите ангажмани како инструкторка по јога.

Ивана веќе две години има своја ветеринарна болница во која се справува и ги лекува здравствените проблеми на животните.

„Многу лесно се справувам со животните како пациенти, со луѓето е малку потешко. Без оглед на тоа што не можат да зборуваат, животните знаат да покажат како се чувствуваат. Се прават одредени испитувања, кои дополнително упатуваат на проблемите со кои се соочуваат“, вели Ивана.

Неодамна Ивана се врати од едно несекојдневно патување во Индија, за кое вели дека било од исклучително значење за стекнување нови знаења и искуства, кои планира да ги пренесе на своите клиенти во студиото по јога.

„Индија е позната по јогата, од таму потекнуваат корените на јогата. Со колешката со која заедно предаваме јога, одлучивме малку повеќе да се сертифицираме и заедно отидовме во градот Мајсор, каде што почнала да се практикува штангата. Бевме во училиште за јога каде што имавме часови во текот на целиот ден и научивме многу нови работи, за кои не верувам дека некаде во Европа би можело да се научат. Индија е како друга планета, храната е различна, самите луѓе и верувањата се различни. Најлошото е тоа што е пренаселено, има толку многу луѓе што кога ќе излезеш на улица, не можеш да најдеш мир, секаде е метеж и врева“, раскажа, меѓу другото, Ивана за своето искуство од патувањето во Индија.

За сето ова и уште повеќе од разговорот со Ивана, можете да погледнете на следниот линк: