Советниците во Советот на Град Скопје на маратонска седница која траеше околу 12 часа синоќа го усвоија Буџетот на Град Скопје за 2023 година. Граѓанската иницијатива Зелен Хуман Град поднесе 14 амандмани, но мнозинството во Советот прифати само неколку од нив.

-Го поддржавме предложениот буџет но не сметаме дека ова е начинот на кој треба да се планира буџетот на еден град со оглед на тоа што ние според законот имаме обврски, одредени приливи кои влегуваат во градот по основ на надомест за градежно земјиште итн. Тие после да се одвојат за улици што значи асфалт и бетон во Скопје и тука доаѓаме фактички во еден ќорсокак при што ние сакаме еден начин на планирање на градот, хумано и одржливо, а реалноста е друга. Има излез од таа ситуација, всушност тоа се нашите предлози кои се капитални инвестиции во сферата на животната средина како што се компостарите за третман на биоотпад кој како амандман беше прифатен на вчерашната седница, рече Драгана Велковска, советничка од граѓанската иницијатива Зелен Хуман Град во гостувањето во емисијата „Утрински печат“.

Таа очекува годинава Градот да набави барем две компостари зошто тоа инвестирање создава можност за понатамошни заштеди на градот, намалување на отпадот во Скопје и околу 70 проценти од вкупниот комунален отпад се трга и од контејнерите и од депониите во градот.

-Буџетот на Град Скопје е стабилен и со години наназад покажува суфицит и нема долгови како што имаат некои други општини и потребно е со вакви паметни проекти да се одвојат финансии од кои градот може да заштедува и да ги намалува трошоците кои ги има за тој отпад, зошто се плаќа депонирањето и на тој начин да го намали загадувањето зошто расфрланиот отпад на депониите емитира стакленички гасови. Депониите се самозапалуваат спонтано и тоа е метан во атмосферата, еден од најопасните стакленички гасови, рече Велковска.

Советничката Велковска реагираше што нејзините колеги во Советот на Град Скопје не го поддржаа амандманот за поставување фотоволтаици на повеќе објекти во Градот.

-Во време на енергетска криза да не се инвестира во таков систем на заштеда е неприфатливо. Кога имате толкав сончев потенцијал, да не го користите и да ги ограничувате домашните производители и нивната енергетска независност и државата да не им овозможи на граѓаните да излезат од енергетска сиромаштија не е добро. Граѓаните не го препознаваат концептот на енергетска сиромаштија. Тоа не значи сиромаштија сама по себе. На владата и одговара луѓето да не знаат дека иако во суштина водат некаков нормален живот и се добро ситуирани, сепак не се. Ако вие размислувате дали да го греете или не цел стан, вие сте енергетски сиромашни без оглед на вашите приходи. Бараме тоа да се прекине, бидејќи соларната енергија има најмал негативен ефект врз животната средина и животот на граѓаните и е единствен извор на енергија кој може да овозможи енергетска независност, нагласи Велковска.

Општините мора да гледаат прогресивно и визионерски, повеќе немаме луксуз да се однесуваме како пред 6 века, рече Велковска образложувајќи го прифаќањето на нивниот предлог за изработка на Стратегиска оцена за влијанието врз животната средина во ГУП-от 2022-2032 г. кој беше прифатен од советниците.

Меѓудругото вчера беше прифатен и амандманот за субвенции за ЈП Лајка кое со 15 милиони денари ќе може да ја спроведува програмата „Залови, стерилизирај, вакцинирај, врати“ со што ќе можат за првпат да се оперираат меѓу 2.500 и 3.000 единки бидејќи тоа никогаш претходно не било направено, а тоа е околу 75 отсто од вкупната популација на бездомни животни на улиците за да се доведе стапката на репродуктивност на нула.

-ЈП Лајка на годишно ниво генерира големи загуби поради исплата на оштети по основ на каснувања на граѓани и тоа е разработена шема која се злоупотреба. Има судски трошоци, извршители, камати, а ние на овој начин сакаме и да заштедиме буџетски пари. Со операциите се намалува агресијата на животните, не се формираат глутници и тоа е и во корист на животните и на граѓаните, децидна е Велковска.

Целиот разговор со Драгана Велковска погледнете го во видеото: