Во близина на Градскиот парк во Скопје, во една од куќите има мала дестилерија, во која се произведува домашен џин. Овој невообичаен пијалок за производство во нашата држава, на еден од најголемите натпревари „Џин гајд“ , минатата година ја освои првата награда за најдобар џин од Копнена Европа и по бодови е петти најдобар во светот.

Главниот технолог, Милица Плетварска, која гостуваше во „Утрински печат“, раскажа како инвеститорите се охрабриле во Македонија да прозведуваат џин и како таа, како стручен кадар, заедно со тимот, успеле да направат уникатен македонски џин на кој печат му дава планинскиот чај од Глаичица.

Приказната се создала кога Греам Лутер од Шкотска – земја која е позната во светот по квалитетн џин, почнал да истражува каде има најквалитетни состојки за џин, а клучната состојка – смерката од Галичица, се покажала како една од најквалитетните смреки во светот. Тој и инвеститорот од Македонија, Иван Скендероски пред 5 години ја почнале приказната со крафт џин од мала дестилерија, но морале да изодат подолг пат, така што прозводството на џин почнало во декември 2021 година, а џинот го крстиле „Смидџин“ што треба да осоцира на нешто мало, а перфектно.

– Смреката е од Галичица. Многу луѓе има што ја собираат смреката и што ја продаваат на откупувачи, од каде пак ние ја купуваме. За производство на џин покрај смерка мора да има и други состојки. Има една процедура која се нарекува „лондон драј џин“. Тоа не е џин добиен од Лондон туку така е наречена процедурата. „Смидџин“ е направен по таква процедура. Значи мора да има три основни состојки – смрека, „анџелика рут“ – тоа е корен од сладок багрем и семе од коријандер. Кај „лондон драј џинот“ задолжително е и етанолот да биде произведен од зрно – пченка, пченица…Тоа е кога станува збор за составот, а кога станува збор за начинот на производство, сè што влегува во овој пијалок треба да влезе пред дестилација, значи нема можност за корекција по дестилација. По добиениот дестилат само го намалуваме алкахолот за да го „израмниме“ потебниот алкохол за нашиот џин – вели Плетварска.

Повеќе за оваа успешна бизнис-приказна погледајте го ВИДЕО-ИНТЕРВЈУТО: