За трчање ви треба само волја, вели Кокан Ајановски, кој со години на Кејот на Вардар во Скопје тренира голем број на професионалци, рекреативци, ентузијасти и вљубеници во спортот.
Во интервјуто за Слободна ТВ, Ајановски открива дека секој човек без хронични здравствени пречки, би можел активно да се занимава со трчање.

– Трчањето зема замав во светот во последните години и тој тренд не ја одмина ниту Македонија, што е добра работа секако. Сега имаме трки речиси секоја недела, на кои 90 отсто од учесниците се аматери и рекреативци. На времето беше чудно да видите човек како трча покрај кејот, но сега тоа е сосем нормална слика во нашиот главен град – вели Ајановски.

Тој тврди дека со посветеност, за краток период секој рекреативец може да дојде до видливи резултати.

– Со адекватна исхрана и правилни вежби, за краток рок се губи вишокот на килограми, а крајната цел во трчањето, секој поединец самиот си ја одредува – смета Ајановски.

Наскоро се очекува да излезе и неговата нова книга, која повторно е посветена на трчањето.

– Насловот на мојата нова книга е „Трчам за тебе“ и очекувано повторно е посветена на трчањето – додава тој.

Интересен факт посветен за Ајановски е тоа што пред точно 10 години решил да се откаже од професијата во градежништвото, каде работел неполни три години по дипломирањето на Машинскиот факултет во Скопје и комплетно да му се посвети на трчањето.

– Цел живот сакав да бидат дел од спортот и да живеам од спортот. Точно е дека се обидов да егзистирам како машински инжинер, но како и многу други млади луѓе во Македонија останав разочаран бидејќи поради непотизам и други негативни појави не добив вистинска шанса за напредок. Но, не жалам по тоа, бидејќи пред точно 10 години решив професионално да се занимавам со трчањето и тоа уште го правам – порачува Ајановски.

Целото интервју со Кокан Ајановски можете да го погледнете во продолжение.