„Скопје во декември станува европски град благодарение на ПИН и Таксират – музички фестивали на кои се доаѓа поради името а не поради програмата којашто ја нуди фестивалот. Тоа е знак дека младите нам ни веруваат“ – рече една од главните организатори на фестивалите Рамона Моња Кочишка во утринската програма на „Слободен печат“.

Кочишка додаде дека кога станува збор за ПИН фестивалот – неопходно е да се знае дека целиот концепт е поделен на две програми: конференции и изведувачки настани (концерти) а, целта е да се привлечат македонски музичари, луѓе кои се дел од македонската музичка индустрија да дојдат и да се запознаат со гостите кои ги носи самиот фестивал – делегати од големи фестивали како на пример од: Егзит, Зигед, Tomorrowland во склоп пак на музичката програма носиме македонски нови бендови кои треба да бидат препознаени токму од тие делегати.

„Пин е бесплатен фестивал и достапен до сите, непознавајќи граници – годинава се присутни повеќе од 300 делегати од странство а преку 52 изведувачи. Истиот фестивал се одвива на 5 бини и годинава се слави јубилеј – 10 години од неговото постоење. Ние сме изненадени од посетеноста и интересот на младите кои го јавуваат за посета на ваков фестивал“ – додаде Кочишка.

Рамона рече дека Таксират како фестивал пак е темелот на новиот милениум во Скопје. Оваа година слави 25 години од своето постоење и годинава фестивалот е посветен на сите пријатели кои биле дел и го поддржале фестивалот Таксират во изминатите 25 години а тука се вбројуваат: Дубиоза, Сарс колектив, Дуо французи, Дабе Фикс и уште многу други големи музички имиња.

„Целта на самите фестивали е да привлечеме што е можно повеќе млади да се интересираат за култура и музика и им оставаме простор да се заинтересираат да дојдат и да се пронајдат во некој од секторите – сите си имаат свое место под сонцето. Фестивалите ПИН и Таксират не познаваат граници и преку музика ги спојуваат сите генерации“ – рече Кочишка.