Фиљана Кока тврди дека се кандидирала за претседателска функција во Здружението на новинарите на Македонија (ЗНМ), за да гласно, јасно и на право место да бидат адресирани проблемите на новинарите.

– Повеќе од 30 години сум новинар и тоа новинар теренец. Се познавам со сите колеги и ги знам сите проблеми, што ги имаат моите колеги додека известуваат на терен. И кога е плус 40 и кога минус 20. Новинарите мораат да бидат прашани, тие да бидат главните креатори на медиумските политики – изјави Кока, за време на нејзиното гостување во студиото на „Утрински печат“.

Таа смета дека во последните четири години, раководството на ЗНМ делувало како да е заспано.

– Тоа што пред четири години беше оставено како агенда, како отворени прашања кои претходниците не можеле да ги затворат, како воопшто да не беше допрено во изминатите четири години. Претседателот Здружението има обврска постојано да притиска, да реагира до институции и целата работа да ја држи во постојана кондиција. Кога некој новинар е нападнат, тогаш самата јавност тоа го осудува и затоа во таква ситуација ЗНМ не треба и тоа да го осуди нападот, туку треба да преземе мерки -смета новинарката на МТВ.

Кока е децидна и кога оценува дека во соопштенијата издадени од ЗНМ, во изминатиот период можело да се забележи и селективност.

– Не може да има селекција во соопштенија, не може да има еден аутпут во кондиционата трка со институциите кога се работи за новинарите. Бескомпромисна е битката за новинарите. Недозволиво е во 2022 година, кога сме членка на НАТО, да имаме напади врз новинари – додава таа.
Кока е против и измените на Законот за аудио-визуелни услуги, со кои ќе се овозможи државното финансирање на телевизиите.

Целото интервју со Фиљана Кока, погледнете го на следниот линк: