Со нашата редовна соработничка, нутриционистката Емилија Спасовска Мојсовска, овој пат во емисијата „Слободен печат“ зборувавме на тема што е многу актуелна кај целата светска популација. Хуман папилома вирус или ХПВ-вирусот е глобален проблем со кој, како што вели Емилија, се соочува 60 отсто од популацијата.

Општопознато е дека една од главните причини за активирање на овој вирус е намалениот имунитет, што резултира со низа здравствени проблеми, па дури и со рак на грлото на матката. Покрај советите на лекарите, клучна улога во јакнење на имунитетот секако имаат и стручните совети на нутриционистите.

– Хуман папилома вирус (ХПВ), како што кажува и неговото име, претставува вирусно заболување кое ги инфицира слузокожата, кожата и мукозните мембрани. Најчесто се пренесува преку сексуален пат и се смета дека 60 отсто од населението, особено женската популација, е инфицирана од овој вирус. Проблемите се појавуваат кај жените, конкретно на грлото на матката, што може да доведе до рак.

Независно од периодот на годината, односно во текот на целата година потребно е да внимаваме на нашиот имунитет, бидејќи тој е клучен за ХПВ-инфекциите. Еден од советите и на лекарите, доколку се откријат промени во грлото на матката предизвикани од ХПВ-вирусот, е токму промена на режимот на исхрана. Со цел да се реши овој глобален проблем, потребни се советите и на лекар и на нутриционист, во смисла на едукација на родителите што имаат деца во раст и развој и стапуваат во сексуален акт – објаснува Емилија за ХПВ-вирусот.

Она што е карактеристично за овој вирус е тоа што може да се контролира со одржување на имунитетот на високо ниво.

– Можно е ХПВ-вирусот да е присутен во организмот и една деценија, меѓутоа, да не прави никаков проблем, но може да се случи и за три месеци да развие клиничка слика, а тоа се должи на имунитетот. Сѐ она што ние треба да го направиме е да го држиме имунитетот на завидно ниво, бидејќи не само ХПВ вирусните инфекции, туку сите вирусни и бактериски инфекции и секоја состојба во организмот е поврзана токму со имунитетот. Затоа и лекарот ќе ви го каже истото, дека е потребно да се има хигиено-диететски режим на исхрана. Потребно е да внесуваме храна со здрави и балансирани оброци, а тоа значи да имаме појадок, ручек и вечера, богати со витамини и минерали, со макро и микро елементи, кои ќе направат супресија на самиот инфект. Покрај режимот на исхрана, секогаш препорачувам и физичка активност барем триесет минути во текот на денот – вели Емилија.

Денес можат да се прочитаат безброј совети за тоа како треба да го зајакнеме нашиот имунитет, но сепак, постојат некои информации што можеме да ги добиеме само од стручни лица, кои добро ја познаваат ова проблематика. За тоа каква храна треба да консумираме доколку имаме проблеми со ХПВ-вирусот, Емилија вели:

– Во однос на исхраната ќе спомнам дека е потребно внесување храна богата со витамините А, Б, Ц и Д, односно оние витамини што се потребни за јакнење на имунитетот и при сезонските вирусни и бактериски инфекции и, меѓу другото, храна со високи антиоксиданти. Тука ќе ја спомнам и фолната киселина, односно витаминот Б9, кој не се препорачува само во текот на бременоста, туку е клучен и за луѓето со висок крвен притисок, анемија, консументи на алкохол, па и за оние што имаат проблеми со ХПВ-инфекции. Постојат научни студии што покажуваат дека луѓето со дефицит на Б витамините имаат манифестација на ХПВ-инфекции. Сите овие витамини ги има во зеленолиснатиот зеленчук, брокулата, карфиолот, морковот, авокадото, дињата, црвеното овошје и сѐ што содржи бетакаротен, ликопен, а тоа се антиоксиданти, кои се особено потребни за ХПВ-инфекциите. Покрај исхраната, потребна е и дополнителна суплементација од овие витамини, конкретно 1.000 мг витамин Ц, како и бетакаротенот од 25 до 30 мг во текот на денот, за да го истуркаме инфектот од нашиот организам – вели Емилија.

Остатокот од разговорот можете да го погледнете на следниот линк: