За секоја операција треба да се има оперативен план-вели доктор Стефан Арсенков, специјалист по абдоминална хирургија во Универзитетска клиника по хируршки болести „Св.Наум Охридски“ од Скопје во утринската емисија „Слободен печат“ на Слободна ТВ.

– Од исклучителна важност за изведување на секоја операција е да се има соодветен оперативен план. Конвенционално до сега, тоа се прави на база на рендгенски слики, компјутерска томографија, магнетна резонанца. Но, ние отидовме чекор понапред со овозможувањето на ресурси за предоперативно планирање, со тоа што на база на конвенционалните методи на испитување како компјутерска томографија и магнетна резонанца, генерираме и произведуваме, односно, печатиме модели од индивидуалната анатомија на секој пациент коишто понатаму ни помагаат и пред и по текот на изведување на операцијата-вели Арсенков.

До сега имаат изработено неколку модели, модел од ’рбет, еден модел од скочен зглоб и модел од внатрешните органи на пациент со промена на слезината.

-Ова е тродимензионална конструкција на сите тие пресеци која ни дава реален приказ на анатомијата на секој пациент и реален, идентичен приказ на структурите со коишто ние се соочуваме со текот на оперативната интервенција. Тоа ни помага да бидеме по прецизни во текот на самата интервенција, да знаеме точно како пристапуваме кон заболениот орган којшто треба да се отстрани или оперира и ни помага да ги спречиме сите изненадувања и евентуални компликации кои ги спречуваме со соодветна предоперативна подготовка и оперативен план кој го правиме базирано на овие модели-вели докторот.

Ова го прават во период од една година наназад. Прво вежбале се со цел да се направат модели без тоа да влијае врз третманот на пациентите. Откако го усовршиле процесот и установиле дека со моделите коишто ги добиваат досега третирале повеќе од десетина пациенти.

– Интересен факт е дека изминатава недела, еден од нашите последни модели коишто ги генерираме беше модел на вродена срцева маана кај двомесечно бебе и тоа беше на иницијатива на колегата Иво Паунковски. Го генерираме и го сработивме по моделот на срцето со сите придружни крвни садови којшто беше искористен за соодветно предоперативно планирање, и помогна во дијагнозата, во подобра претстава на тоа што се работи кај бебето, па и помогна успешно да се заврши оваа операција кај тој млад пациент-вели Арсенков.

Со користењето на овие модели, докажале дека многу по кратко траат самите операции од дваесет до триесет отсто. Изработката на моделите со соодветна подготовка и експертиза, не трае подолго од два-три дена и тоа воопшто не влијае на одложување на операцијата.

– Во најголем дел на планираните операции којашто секако си има процедура којашто си тече, пациентот треба да биде соодветно подготвен од секој аспект, а ние го користиме тој период за да можеме да ги генерираме и изработиме овие модели-вели докторот.

Во Македонија тој нема податок дека претходно се има користено оваа технологија, а на светско ниво, трудовите коишто се објавени на тема на користење на 3-Д печатење во хирургијата почнуваат да се објавуваат пред дваесетина години, еден или два труда на светско ниво.

– Коските се малку полесни за добивање и изработка, со тоа што многу се разликуваат од своите околни ткива, и затоа во светот прво се почнува со оваа технологија и техника, навлегува преку ортопедијата и ортопедската трауматологија. По завршувањето на операцијата наша првична цел е да имаме здрав и пациент. Овие модели остануваат во нашата установа во којашто како Универзитетска клиника постојано врши едукација и на специјализанти и на студенти и им се овозможува на нашите идни колеги да се соочат со нешто што не виделе претходно-вели Арсенков.

Со оваа технологија Арсенков вели дека студентите имаат една уникатна можност да видат како изгледаат внатрешните органи кај многу различни пациенти и како изгледаат внатрешните органи со промена на одредена патологија.

Целото интервју на колешката Мирослава Симоновска погледнете го во продолжение: