Кошаркарите на Индијана пејсерс се наоѓаат на чекор до големо финале во НБА лигата, откако изминатата вечер повторно го совладаа Њујорк Никс на гостински терен со 114-109 и поведоа со 2-0 во финалната серија од Источната конференција.

За Никс, ситуацијата станува сè потешка, историјата не е на нивна страна, бидејќи ниту еден тим досега не успеал да се врати од 0-2 во финале на конференција кога првите два меча ги загубил на домашен паркет.

Овојпат, за разлика од првиот натпревар кој беше решен во продолжение по голем пресврт, битката беше тесна до последниот звук на сирената. Пејсерс имаа предност од десет поени на три минути до крај, но Никс успеаја да намалат на само еден (110-109), заканувајќи се со ново враќање. Сепак, Арон Несмит беше прецизен од линијата за слободни фрлања, а Мајлс Тарнер со четири последователни поени се погрижија да нема некакво пресврт.

Најистакнат поединец во победничкиот тим беше Паскал Сиакам, кој одигра одличен натпревар и уфрли 39 поени со извонреден шут од поле (15/23), додаде и пет скока и три асистенции. Тарнер придонесе со 16 поени, а Тајрис Халибартон беше блиску до трипл-дабл со 14 поени, 11 асистенции и осум скока.

Кај Њујорк, Џејлен Брансон повторно беше лидер со 36 поени и 11 асистенции, додека стабилен учинок имаа и Бриџис и Таунс, кои постигнаа по 20 поени и додадоа по седум скока.

Третиот натпревар е закажан за недела во Индијанаполис, каде што Пејсерс ќе имаат шанса пред своја публика да направат уште еден чекор кон првото финале во новата ера на клубот.