Полската тенисерка Ига Швјонтек обезбеди пласман во осминафиналето на грен слем турнирот САД опен откако со 7-6 (2), 6-4 после два неполни часа игра триумфираше над Ана Калинскаја.

Иако Швјонтек, моментно втора тенисерка во светот, беше првата што го загрози сервисот на нејзината противничка, стигнувајќи до две брејк топки, Калинскаја беше таа што влзе подобро во овој меч.

Не само затоа што 29 тенисерка во светот успеа да го одбие тој напад, туку и затоа што врзаше пет гема за да поведе со 5-1 во првиот сет.

Калинскаја двапати сервираше за водство во сетови и двапати ѝ дозволи на полската тенисерка да направи брејк, по што Швјонтек резултатски се врати, а потоа направи целосен пресврт во тај-брејкот.

Беше тоа премногу за противничката која веднаш дозволи брејк во вториот сет, и иако повторно направи рибрејк, уште еднаш беше надиграна во финишот и на мечот и на крајот Швјонтек запиша конечен триумф.

Швјонтек за пласман во четвртфиналната фаза на турнирот ќе игра против Екатерина Александрова, која исто така го заврши својот меч по полноќ по средноевропско време. Успеа да ја елиминира Германката Лаура Зигмунд полесно од очекуваното со 6-0, 6-1).

Беатриз Хадад Маја од Бразил исто така оствари лесен триумф, совладувајќи ја Марија Сакари од Грција (6-1, 6-2).

Противничка на Хадад Маја во осминафиналето ќе биде осмата носителка, Американката Аманда Анисимова.