Можеби не знаевте дека постои, но Светското првенство во јадење коприва се одржува секоја година во Англија.

Оваа година учествуваа околу 30 луѓе од различни делови на светот, меѓу кои Велика Британија, Холандија и Соединетите Американски Држави, пишува „Пункуфер“.

На Светското првенство во оваа необична дисциплина, кое се одржа минатиот викенд на фармата за јаболковина во Вејтон во близина на англискиот град Бридпорт, беше поставен нов рекорд во јадење на сирова коприва.

Том Вилер од Лондон изел дури  25,4 метри сурови листови од стебленцата на коприва, со што го соборил претходниот рекорд на јадење на коприва од 19,5 метри.

Бранителот на титулата во женска конкуренција, Бет Хоџис, ја задржа титулата јадејќи 19,5 метри листови од коприва, со што го собори сопствениот рекорд за консумирање на бодликава билка од минатата година за 1,2 метри.

Светското првенство во јадење коприва се одржува од осумдесеттите години на минатиот век. Првично натпреварот се одржувал во Маршвуд, но по затворањето на тамошната гостилница бил преместен во фармата за јаболковина во Вејтoн.

Стебленцата од коприва се собираат и се сечат на парчиња од 2 стапки или 61 сантиметар. На натпреварувачите им се дава да пијат јаболковина додека ги кинат листовите од копривата или можат да го потопат својот зелен оброк во неа пред да го стават во уста.

Јаболковината наводно го олеснува голтањето на зелените листови на копривата, но го ублажува и чувството на печење во устата предизвикано од нејзиното конзумирање.

Инаку, победник на натпреварот е оној кој ќе изеде најмногу коприви за 30 минути.