Полициски хеликоптер од типот „Бел-412“ од Одделот за воздухопловни единици на Министерството за внатрешни работи во неделата интервенираше во гаснење на пожар во околината на селото Нивичино, општина Василево.

Според информации од МВР, интервенцијата била извршена поради повторно разгорување на огнената стихија и опасноста што ја претставувала за неколку викендици, како и за припадниците на теренските екипи кои се обидувале да го локализираат пожарот.

Хеликоптерот извршил прецизни налети во близина на патот и објектите опколени од пламенот, со цел да се овозможи безбеден премин и евакуација на загрозените лица, како и повлекување на пожарникарите и другите ангажирани служби на безбедна оддалеченост.

Ова е само една од низа интервенции на воздухопловната единица, која во последните денови е интензивно ангажирана на повеќе критични точки низ државата поради зголемениот број пожари на отворен простор.