Градоначалникот на Ново Село, Ѓорѓе Божинов, пожарникари и неколку граѓани се заробени околу огнена стихија на планината Огражден. Божинов преку видео-обраќање на Фејсбук побара помош да бидат евакуирани.

– Во моментов се наоѓаме на планината Огражден, на надморска височина од околу 1.000 метри. Состојбата со пожарите е алармантна, иако од утрово дејствуваат два хеликоптери – еден од Србија и еден од Турција, пожарите заради високите температури се повеќе се шират – вели тој.

Божинов додаде дека се наоѓаат во радиус од околу 500 метри а околу нив има пожар. Очекуваат да дојдат два хеликоптери да ги изгаснат пожарите или да бидат евакуирани, бидејќи, како што истакна, сите копнени врски им се прекинати во овој момент.