Пожар попладнево ја зафати црквата „Вознесение Христово“ во скопското село Мршевци, во општината Илинден, а граѓаните објавуваат драматични повици за помош на социјалните мрежи.

Врз црквата се проширил еден од пожарите кои избувнаа во поширокиот скопски регион попладнево, кои според надлежните биле предизвикани од искрење на електрични жици од силниот ветер.

Пожарот се проширил и кон селото Бујковци, носен од силниот ветер, информираше од терен директорот на Дирекцијата за заштита и спасување, Стојанче Ангелов.

Сообраќајот на автопатот Скопје-Куманово е во целосен прекин поради чадот и намалената видливост од блиските пожари.

Искрењето предизвика десетина пожари во Скопско и Кумановско во исто време, а пожарникарите се борат да стигнат на сите локации каде што гори. Авионите „Ер трактор“ и хеликоптерите не можат да дејствуваат поради временските услови, вели Ангелов. Ветрот продолжува да дува и да ја разгорува огнената стихија на повеќе места.

Читател на „Слободен печат“ ни испрати снимка направена во близина на приградската населба Илинден, на која се гледа дека линијата на огнот е широка можеби и еден километар.

Уште тоа ни требаше – искрење на жици од силниот ветер попладнево предизвика пожари во Скопско и Кумановско