Облаци од густ црн чад се вивнаа претпладнево над тетовско откако голем пожар избувна во магацин и продажен салон каде се продаваaт бои, лакови, санитарија и пластика.

Се работи за компанијата „Евроком“ лоцирана на влезот од село Фалише оддалечено на неколку километри од Тетово. Пожарот се става под контрола, а пламените јазици го голтнаа речиси цел магацин и продажен салон на површина од 1000 метри квадратни. Екипите од Противпожарната единица Тетово со колеги од Куманово, Велес, Скопје и Гостивар успеаја да го спречат пожарот да не се прошири на соседните објекти.

Од Центарот за управување со кризи со апел до граѓаните ако немаат потреба да не поминуваат околу објектот оти аерозагадувањето е многу големо.

„Постои опаснот целата зграда да падне, надворешните ѕидови може да бидат урнати оти постои голема температура. Полицијата го обезбедува местото да нема некој инцидент и тие кои во оваа околина немаат некоја обврска веднаш да се оддалечат оти квалитетот на воздухот е многу низок. Апелирам до сите жители да не ги отвораат прозорците и да не се движат надвор, се додека не се добијат дополнителни информации. Побарав од надлежното министерство ако има можност да испратат мобилна станица за мерење на загаденоста на воздухот. Стапивме во контакт и со армијата да испратат тим од АБХ односно биолошко- хемиско оружје да се испита дали тука има отрови. Мала е веројатноста да има голем отрови оти ние стоиме овде, но факт е дека има штетни материи во воздухот, рече Стојанче Ангелов претседател на ЦУК.

Од Центарот за јавно здравје Тетово, велат дека загадувањето е големо и е во радиус од 2 километри околу објектот. Ќе мора да се направат дополнителни испитувања, додаваат оттаму.

„Наша препорака оти и во моментов имаме големо аерозагадување и пожарникарите се изложени на опаснот и сите ние кои сме овде, без потреба тука да не бидеме на ова место. И во радиус од 2 километри околу објектот, без потреба да не излегува населението. Ќе се изврши испитување на водата, почвата, но во прво време и вие како новинари сте изложени на ризик, вели доктор Ратко Давидовски специјалист по хигена и здравствена екологија.

Тетовските пожарникари очекуваат во текот на денешниот ден да го ликвидираат пожарот, а на помош освен нивните колеги од повеќе градови, во пресрет излегоа и приватни фирми кои со нивната механизација интервенираа врз пламените јазици.