„Си-ен-ен“ во петокот објави вознемирувачки снимки од надзорни камери, на кои се гледа како американскиот продуцент и рапер Шон Комбс (54), познат како Диди, врши брутално насилство врз неговата поранешна партнерка Касандра Вентура (37), позната како Каси, во хотелот „Интерконтинентал“ во 2016 година.

Музичарот сега се огласи на својот инстаграм-профил и објави видео со наслов „Навистина ми е жал“.

„Го допрев дното, но не барам изговори. Тешко е кога треба да се размисли за најтемните моменти во вашиот живот, но понекогаш тоа е неизбежно. Јас не бев добро“, започна раперот.

„Мислам дека го допрев дното, но не барам оправдувања, моето однесување во тоа видео е неоправдано. Ја преземам целосната одговорност за моите постапки во тоа видео, згрозен сум. Ми се гади кога го правев тоа, ми се гади сега. Отидов и побарав стручна помош, отидов на терапија, на рехабилитација. Морав да го молам Бога за неговата милост и спасение. Многу ми е жал. Но, јас сум посветен на тоа да бидам подобар човек секој ден. Не барам прошка, навистина ми е жал“, додаде Диди.

Да потсетиме, Диди и Каси постигнаа спогодба само еден ден откако пејачката поднесе тужба во која го обвини раперот дека постојано ја напаѓал, ја тепал и ја силувал во последните десет години од нивната врска.

Во тужбата навела дека го запознала Диди во 2005 година, кога имала 19 години. Пејачката тврди дека тој ја контролирал и бил насилен со неа уште од самиот почеток. Таа изјавила дека ја терал на секс со машки проститутки, а тој го снимал тоа. Исто така, физички ја малтретирал и ја дрогирал.

Каси тврди дека Диди честопати „дивјачки ја тепал“. Наводно, сè се одвивало пред очите на неговите вработени, а Диди, според пејачката, често ја терал да го носи неговото огнено оружје во чантата „за да има на ум дека е способен тешко да ја повреди“.