Огромна природна катастрофа се случи во швајцарските Алпи кога голем дел од глечерот Бирх се сруши, предизвикувајќи поројна лавина од мраз, кал и камења што речиси целосно го потопи селото Блатен во јужната долина Лечентал во Швајцарија.

Властите претходно овој месец го евакуираа селото по знаци на забрзување на движењето на глечерите, со што се спречија големи човечки жртви. Сепак, 64-годишен маж е исчезнат и во тек е операција за негово лоцирање со помош на дрон опремен со термална камера.

„Околу 90% од селото е покриено или уништено. Зборуваме за огромна катастрофа“, рече Штефан Ганцер, раководител за безбедност за регионот Вале.

Сликите објавени на социјалните мрежи и во швајцарските медиуми ги покажуваат домовите и инфраструктурата на Блатен полузакопани во огромна маса кал, додека глечерот се чини дека се срушил од голема висина, носејќи сè на својот пат.

Владата на кантонот Вале објави дека колапсот на глечерот резултирал со покривање на коритото на реката Лонца, зголемувајќи го ризикот од блокирани текови и можни поплави во областа.

„Постои ризик ситуацијата да се влоши“, предупреди Ганцер.

Швајцарските вооружени сили се мобилизирани уште од претходните денови, кога забрзувањето на движењето на глечерот беше знак за непосредна опасност.

На прес-конференција, швајцарскиот министер за животна средина, Алберт Рости, изрази жалење за катастрофата, која ја опиша како „неверојатен настан“, нагласувајќи дека федералната влада ќе преземе мерки за поддршка на погодените жители кои ги загубија своите домови.

Околу 300 жители на Блатен и целиот добиток во областа беа евакуирани како мерка на претпазливост во претходните денови, бидејќи научниците проценија дека глечерот – со волумен од 1,5 милиони кубни метри – ќе се сруши.

Швајцарските научници постојано предупредуваат дека забрзаното топење на глечерите во земјата главно се должи на климатските промени и зголемувањето на температурите.

Швајцарија има најголем број глечери во Европа и во 2023 година изгуби 4% од вкупниот волумен, што е втора најголема загуба во една година – по 6% во 2022 година.