Перфектно деби на својот нов стадион „Хил Дикинсон“ имаа фудбалерите на Евертон кои после неубедливиот настап и пораз против Лидс во првото коло, сега значително го поправија впечатокот во Премиер лигата. Екипата на Дејвид Мојес лесно ги освои првите три бода оваа сезона откако триумфираше со 2:0 против Брајтон.

Од самиот почеток на натпреварот, шкотскиот специјалист реши да го испрати на теренот најпознатото засилување од летниот преоден рок, Џек Грилиш. И тоа му се исплатеше. Не преку голови, туку преку асистенции. Поранешниот играч на Манчестер сити прво одлично му го додаде на Ндијаје во 23 минута, кој со прецизен удар му донесе водство на Евертон.

Уште една магија од Џек Грилиш беше видена во 52 минута, кога му асистираше на Џек Гарнер, а тој со силен удар ја испрати топката во противничката мрежа. Брајтон можеше да додаде драма во последните минути од натпреварот, но Дени Велбек промаши пенал, или поточно голманот Џордан Пикфорд ја виде својата намера и го одбрани пеналот.

Немаше победник во дуелот помеѓу Кристал Палас и Нотингем Форест (1:1). Кристал Палас се збогуваше со својот најдобар играч, Еберечи Езе, кој замина во Арсенал. Во првото полувреме од мечот во Лондон екипата на Оливер Гласнер беше подобра, а својата добра игра ја крунисаа во 37 минута, кога Исмаила Сар ја испрати топката во самиот агол од голот на Селс, по центаршутот на Муњоз.

Форест во вториот дел играше многу поконкретно и порешително кон голот на домашната екипа. Па, на додавање од Ден Ендо, Хадсон-Одои отиде сам пред голманот Хендерсон и не му беше тешко да ја испрати топката во мрежата.

Премиер лига, 2. коло

Недела:
Кристал Палас – Нотингем Форест 1:1 (1:0)
Евертон – Брајтон 2:0 (1:0)
17:30 Фулам – Манчестер Јунајтед

Понеделник:
21:00 Њукасл – Ливерпул

Петок:
Вест Хем – Челси 1:5 (1:3)

Сабота:
Манчестер Сити – Тотенхем 0:2 (0:2)
Борнмут – Вулверхемптон 1:0 (1:0)
Брентфорд – Астон Вила 1:0 (1:0)
Барнли – Сандерленд 2:0 (0:0)
Арсенал – Лидс 4:0 (2:0)