Холивудскиот актер Ерик Дејн, познат по улогите во сериите „Вовед во анатомија“ (Grey’s Anathomy) и „Еуфорија“ (Euphoria), отворено проговори за својата борба со амиотрофична латерална склероза – ретка и прогресивна болест што ги зафаќа нервните клетки и предизвикува мускулна парализа, пишува „Пипл“.

Во телевизиско интервју емитувано на 16 јуни, 52-годишниот актер се присети на првите симптоми што ги почувствувал.

„Почнав да чувствувам слабост во десната рака. Не ѝ обрнав внимание – мислев дека ми е заморена од премногу пишување на телефон“, изјави Дејн.

Но, по неколку недели, состојбата се влошила. По низа прегледи кај специјалисти и неколку невролози, по цели девет месеци, конечно ја добил дијагнозата што целосно ќе му го промени животот: АЛС.

„Никогаш нема да ги заборавам тие три букви. Ми се појавуваат во мислите веднаш штом ќе се разбудам. Тоа не е сон“, вели актерот.

Денес, една и пол година откако започнале првите симптоми, Дејн ја изгубил целосната контрола врз десната рака. Левата, која му е доминантна, сè уште функционира, но и таа почнува да слабее.

„Имам само една функционална рака. Десната страна ми е целосно нефункционална. Левата сè уште работи, но чувствувам дека за неколку месеци можеби ќе ја изгубам и неа. Тоа е многу отрезнувачки“, раскажа тој.

Иако сè уште може да оди, Дејн изрази загриженост: „Се плашам дека наскоро и нозете ќе почнат да откажуваат“.

Во април годинава, актерот за првпат ја сподели својата дијагноза со јавноста, истакнувајќи: „Ми беше дијагностицирана АЛС. Благодарен сум што моето семејство е покрај мене додека го минуваме ова тешко поглавје“.

Дејн е во брак со актерката Ребека Гејхарт, со која ги има ќерките Били Беатрис (15) и Џорџија Џералдин (13). Тој упати молба до јавноста за почитување на приватноста во овој чувствителен период.