Снимката на која се гледа како турскиот претседател му удира шлаканица на малото момченце затоа што не му ја бакнува раката, предизвика бурни реакции на интернет.

Инцидентот се случи за време на церемонијата на доделување на куќите кои се обновени како дел од урбаната трансформација во северната провинција Ризе.

По говорот, Ердоган им ги предаде клучевите од куќите на сопствениците.

Две деца од едно семејство излегоа на сцената пред нивните родители. Ердоган им ја подаде раката на децата за да му ја бакнат.

Кога малото момче застанало на неколку секунди и само зјапало во претседателот, тој му удрил шлаканица да го потсетил да му ја бакне раката.

Детето, откако му било „објаснето“ со шлаканицата, му ја бакнало раката на претседателот, кој пак му даде пари како што е ред во Турција. Рака од прва му бакна постариот брат.

Бакнувањето рака на постарите е традиционален обичај во Турција и изразува почит кон возрасната личност.

Претходно турскиот претседател беше на инаугурација и на шега повторно удри по глава мало момче кое мавташе со лентата.