Денеска во рамките од 33 коло во најсилната италијанска лига екипата на Наполи дома ремизираше против Рома со 1:1 на стадионот „Диего Армандо Марадона“.

„Наполитанците“ добро го започнаа натпреварот со водство од 11 минута кога Инсиње беше прецизен од пенал. За домаќините настапи и македонскиот репрезентативец Елиф Елмас кој влзе на теренот во Неапол како замена за Лозано.

Во самиот финиш од средбата римската „волчица“ успеа да го избегне поразот со голот на Ел Шарави после асистенцијата на Ејбрахам во 91 минута.

Веќе втор меч по ред играчите на Лучано Спалети не знаат за победа во клучен дел од сезоната кога се води трката за Скудетото.

На табелата лидер е Милан со 71 бод од 33 натпревари, следува Интер со 69 бодови од 32 натпревари, а Наполи е третопласиран со 67 бодови од 33 мечеви.

Остануваат пет кола до крајот на сезоната, во следните мечеви од Серија А, Наполи на 24 април му гостува на Емполи, на истиот ден Милан е гостин на Лацио, а Интер на 23 април дома ќе игра против Рома.