Џулијан Ленон, синот на легендарниот Џон Ленон, за првпат јавно ја изведе можеби една од најпознатите песни на неговиот татко, „Imagine“ во обид да изрази поддршка на Украина.

Џулијан во саботата на виртуелниот собир „Global Citizen, Stand Up For Ukraine“ ја отпеа песната за идеалниот свет – мир и љубов, без глад и болка.

Имено, 59-годишниот музичар претходно во една прилика изјавил дека никогаш нема јавно да ја изведе песната на неговиот татко, но, сега тоа го направи, барем за да им помогне на Украинците погодени од ужасите на војната.

„Војната против Украина е незамислива трагедија… Како човек и како уметник, се чувствував принуден да одговорам на најзначајниот начин што можев. Така, денес, за првпат, јавно ја изведов „Imagine“, песната на татко ми“, напиша тој на својот твитер-профил.

Зошто сега, после сите овие години?

„Отсекогаш велев дека единствениот пат кога би размислувал да ја испеам „Imagine“ би било кога би бил крајот на светот. Затоа што во таа песна сме транспортирани во простор каде што љубовта и заедништвото стануваат наша реалност, барем за момент. Песната ја рефлектира светлината на крајот од тунелот на која сите се надеваме“, Џулијан ја објасни својата одлука.

The War on Ukraine is an unimaginable tragedy…

As a human, and as an artist, I felt compelled to respond in the most significant way I could. So today, for the first time ever, I publicly performed my Dad’s song, IMAGINE. pic.twitter.com/Qcggk2XaAx

— Julian Lennon (@JulianLennon) April 8, 2022

„Како резултат на континуираното насилство, милиони невини семејства беа принудени да ја напуштат удобноста на своите домови и да бараат азил на друго место“, напиша тој во описот на својата објава на „Јутјуб“, повикувајќи го светот да ја поддржи Украина и сите бегалци.

На собирот „Global Citizen, Stand Up For Ukraine“ учествуваа и други познати изведувачи, како Брус Спрингстин, Елтон Џон, Били Ајлиш и Мадона.