Холивудскиот актер Џони Деп повторно ја презеде улогата на легендарниот пиратски капетан Џек Спароу за да ја исполни желбата на смртно болно 11-годишно момче од Британија.

Кори Паркин-Стоувел, кој е голем обожавател на филмскиот серијал „Пиратите од Карибите“, претрпел две неуспешни трансплантации на срце, но одлучил дека не сака да се соочи со голготата на трета, објави „Би-би-си“. Тој и неговото семејство од Дербишир не знаат колку време му преостанува да живее.

Една од последните желби на Кори била да разговара со својот идол – капетанот Џек, а Џони Деп одговорил во голем стил.

Кори, од градот Рипли, неодамна отвори канал на Јутјуб Kraken the Box, кој веќе има повеќе од 160.000 следбеници.

Меѓу нив е и Џони Деп, кој ја облече својата славната пиратска облека за да сними посебна порака во која се вели: „Ти ја посакувам сета среќа. Јас сум твојот обожавател број еден, капетане Кори. Секоја чест и љубов, пријателе“.

Деп рекол дека ќе ги поттикне своите пријатели да го следат каналот на Кори. Меѓу следбениците е и холивудската ѕвезда Двејн Џонсон, познат како Карпата.

Мајката на Кори, Пикси, рекла дека пораката, организирана од добротворната организација „Замисли желба“ (Make A Wish), била „неверојатна“ и дека го подигнала духот на нејзиниот син во разорниот момент за семејството. Таа рекла дека хирурзите на Кори, кој е роден со хипопластично лево срце, му дале ново срце во 2018 година, но органот бил отфрлен.

Кори бил подложен на втора трансплантација во јануари минатата година, но по травматичниот и болен зафат, неговото тело повторно не го прифатило срцето. Сега, откако разговарал со своите родители и со лекарскиот тим, тој одлучил дека повеќе нема да се обидува.

„Тој секогаш велеше дека, ако некогаш му треба уште една трансплантација, тоа е нешто низ кое никогаш повеќе нема да помине, па штом ми ја кажаа веста, знаев дека ова ќе оди само во една насока“, рекла неговата мајка.

„Сега повеќе нема лек. Првата трансплантација не беше лесна, но помина доста добро. Втората беше крајно травматична за него. Беше исклучително болно и долготрајно и тој мораше повторно да научи да оди и да зборува. Тој рече дека повеќе би сакал да умре отколку да мора да помине низ такво нешто некогаш, никогаш повеќе. Тоа не беше само негова одлука, туку беше вклучен и лекарскиот тим, и не беше лесно донесена, но тој имаше голема улога во оваа одлука и разбира што ќе се случи“.

Одлуката на Кори значи дека тој сега е на палијативна нега и неговото семејство не знае колку долго ќе живее. Сега се подготвуваат за она што очекуваат да биде последниот Божиќ на Кори.

„Секој оброк што го правиме за него, не знаеме дали ќе му биде последен. Секој пат кога ќе го ставиме во кревет, тоа може да биде последен пат. Тоа е поразително. Липав, се молев, се лутев мислејќи – која е поентата Кори да поминува низ сето ова само за да умре. Тој е многу позитивен и максимално го користиме времето што ни останува“, рекла неутешната мајка.