Зимскиот период за нашиот главен град, како и за повеќето населени места ширум земјава предизвикува здравствени проблеми кај граѓаните, откако во неколку наврати дел од градовите на Македонија повторно се најдоа во листата на најзагадени во светот.

Овој круцијален проблем го вклучува црвениот аларм особено во зима, кога мерните станици регистрираат вредности и 50 пати над дозволените.

Загадениот воздух е најопасниот надворешен фактор кој придонесува за ризик од болести и прерана смрт, а на оваа тема разговаравме со директорот на Државниот Инспекторат за животна средина, Сретен Стојковски, кој зборуваше за детектираните проблеми на терен, но и за тоа кои се најчестите причинители за големото загадување.

– Државниот инспекторат за животна средина во месечните планови и во критериумите за ризици оваа состојба ја предвидува постојано, особено во последните три месеци од годината. Имаме направено 40 надзори во поголемите индустриски капацитети, сите тие се под постојан мониторинг. Анализите досега покажуваат дека нема пречекорување на прагот на ПМ штетните честички. Професорите од неколку факултети со нивните студии укажуваат на тоа дека загадувањето на воздухот се предизвикува пред се’ од греењето во домаќинствата, возилата и преголемиот метеж, како и градежништвото.

Стојковски упати апел до сите градоначалници, потенцирајќи дека општинте треба да преземат ригорозни мерки во поглед на градежните активности.

-Секаде се бетонизира, а нема однапред смислено и обезбедено ниту еден квадратен метар зеленило. Неопходно е да се донесе одлука за бесплатен јавен превоз и да се забрани користењето на автомобили, тоа е најдоброто решение, мислам дека на тој начин ќе се ублажат последиците од загадувањето во Скопје и останатите градови. Доколку не настанат промени во однос на зеленилото и давањето дозволи за градби, нормално е да е очекува да има загадување, вели тој.

Државниот иснпекторат веќе има дадено предлог до Министерството за живтоната средина за реоргарнизација на инспекцискиот систем на целата територија, се со цел општинските инспектори не бидат по влијание на градоначалниците.

-Инспекторите треба да излезат на терен и независно веднаш да реагираат, иако знам дека се под влијание на градоначалникот и ако треба да санкционират некое јавно претпријатие се во незавидна ситуација, заклучи Стојковски.