Во почетокот на следната седмица се очекува температурата да достигне и до 42 степени. Во недела се очекува краткотраен пороен дожд, но прогнозите покажуваат дека температурите ќе бележат тенденција на пораст и во следниот период. Карактеристично за овој период е што и за време на ноќта температурата останува висока, тоа во метеорологијата се нарекува тропска ноќ, вели за „Слободен печат“ дежурниот синоптичар Ивана Петровиќ.

– Нашето подрачје се наоѓа под влијание на многу топла воздушна маса од северните делови на Африка. Денеска во попладневните часови ќе имаме појава на мала до умерена облачност. UV индексот ќе има висока вредност 9. Не е исклучена можноста за изолирана краткотрајна појава на дожд на планинските предели, како што беше и во изминатиов период. Повеќе услови за вакви процеси има за во недела. Температурите во следните денови ќе бележат незначителен пораст, на почетокот на следната седмица се очекува температурата низ државата да биде од 26 до 42 степени. Високата температура ќе се задржува и во ноќните часови, на повеќе места нема да се спушта под 20 степени, тоа во метеорологијата се нарекува тропска ноќ – рече Петровиќ.

Оваа појава не е некарактеристична за нашето поднебје, додава таа, но појаснува дека се случувала ретко во претходните години.

На високите темпертури препораките од лекарите се секогаш добредојдени. Хидарција со вода, лесна и светла облека, шапка на главата, се дел од советите на кои надлежните не потсетуваат секое лето. Овие апели најчесто се адресирани за хронично болните и повозрасни лица, но важат за секој од нас. Децата не знаат да кажат дека им е топло, вели д-р Марина Сотировска, дежурен лекар во Итната медицинска помош.

– Грижете се за најмалите во овој топол период, децата не знаат да ни кажат дека им е топло, па затоа задолжително понесете поголемо количество течност со вас за нив, вода, сокче или млеко. Облекувајте ги во светла и лесна облека, тоа што важи и за возрасните важи и за децата – вели д-р Сотировска.

Итната медицинска помош работи со намален капацитет, па молат за разбирање од граѓаните. Оттаму нагласуваат дека нивната помош може да интервенира само во исклучително сериозни ситуации.

– Зголемен е бројот на колапси периодов и на јавни места и на работните места. Одново апелираме до граѓаните да се придржуваат до нашите редовни препораки, да ги завршуваат своите обврски претпладне најдоцна до 11 часот, да се движат по сенка, секогаш да имаат течност со себе, најдобро вода. Високите температури директно влијаат во влошување на состојбата посебно кај лицата со висок притисок или дијабетичарите и покрај тоа што ја земаат редовната терапија. Лицата со дијабетес се нашите најчести пациенти – вели таа.

Алармот за портокалова фаза кој го зафати Скопје, го вклучи и алармот на акцијата на Црвениот крст за пружање прва помош на граѓаните кои се излезени надвор во најтоплиот период од денот. Водата е еден од клучните фактори кои ни помага да му пркосиме на жешкото. Слободен печат денеска помина време со волонтерите на Црвениот крст кои секој работен ден од 11 до 16 часот делат вода на најфреквентните локации во градот.

По околу 600 шишиња вода се делат дневно на граѓаните кои ќе бидат затечени од волонтерите. Оваа акција постои над 15 години, успешноста на оваа хуманитарна активност покажува дека на некој начин луѓето се навикнаа да не излегуваат од дома без вода, но сепак многу убаво реагираат на тоа кога ќе им подадеме шишенце со вода, вели за Слободен печат Арѓенд Чиљафи, стручен соработник за подготвеност и дејствување при катастрофи.

– Совети за тоа како да се заштитите од топлотниот бран, бесплатно шише со вода, нашиот тим се состои и од лекарска помош. Денес се излезени три екипи кои ќе им помогнат на граѓаните да се справат со горештините. Донацијата за бесплатната вода е благодарение на општествено одговорната компанија „Државна лотарија“, секоја година донацијата е од различен спонзор. За оваа недела се ангажирани 13 екипи, 39 волонтери и 2300 шишиња со вода. Следната недела акцијата продолжува со зголемен тим – вели Чиљафи.

Не се случило волонтерите да пријават некој посериозни интервенции, најчесто се соочуваат со ситуации на самото место да измерат притисок или да превезат некоја изнемоштена личност до дома.

– Досега имаме 20 интервенции и асистенции, и тоа од полесен карактер, совети, мерење на притисок. Досега имаме извршено три транспорти до нивните живеалиште, се работи за постари лица кои се затекнати на автобуска постојка директно изложени на сонце – вели тој.

Волонтерите велат дека во периодот кога е најтопло на автобуските постојки забележуваат многу луѓе, понекогаш и по 60-тина.

– Многумина се изненадени кога ќе им го подадеме шишенцето, мислат дека се плаќа, се чудат. Повозрасните секогаш не поздравуваат со некој убав збор дека се благодарни што сме помислиле на нив, велат: алал да ви е на топлото што го правите ова – вели волонтерката Валентина Стефановска.

Погледнете во видеото како се подготвуваат и како изгледа акцијата на волонтерите од Црвениот крст.