Потрагата по тинејџерот Ловре Матошиќ од хрватскиот град Сплит, кој утрово беше пријавен за исчезнат, продолжува и вечерва, иако ноќта ги отежнува напорите на стотици луѓе кои се ангажирани во потрагата, јавија хрватските медиуми.

Полицијата засега нема нови траги во случајот со 17-годишното момче, изјави Анте Јукиќ од сплитската планинска спасителна служба.

Од рано утрото, припадниците на итната, специјалната и основната полиција трагаат по момчето на ридот Марјан над Сплит, со помош на кучиња-трагачи и дронови. Вклучена е и поморската полиција, како и противпожарната бригада. Во вечерните часови спасувачите од ХГСС користат и термални камери.

Според неофицијални информации, мајката на момчето последен пат го видела вчеравечер. Сведоци наводно го виделе Ловро утрото, а покрај велосипедот биле пронајдени и крвави траги.

Сплитската полиција сè уште бара помош од граѓаните за пронаоѓање на момчето, кое било пријавено како исчезнато утрово пред 7 часот. Како што е соопштено, 16-годишниот Ловро побегнал од семејниот стан во Сплит, а неговиот велосипед бил пронајден на јужната страна на ридот Марјан.

Во моментот на исчезнувањето, тој носел јакна во зелено-маслинеста боја, сиви панталони, црни патики со бел ѓон, а на грбот носел црн ранец.

„Доколку имате информации за ова лице, ве молиме известете ја најблиската полициска станица или јавете се на 192. Информациите можете да ги доставите и на е-пошта: [email protected]“, апелираат од полицијата.