Кошаркарската репрезентација на Словенија, предводена од неверојатниот Лука Дончиќ, избори пласман во четвртфиналето на Европското првенство, откако славеше над силната Италија со 84:77.

Иако Словенците не оставија премногу убедлив впечаток во групната фаза, кога го имате Лука Дончиќ во својот состав сè е можно. Токму тој блесна при првата пречка во нокаут фазата.

Првата четвртина беше вистинско шоу за Словенија и за Дончиќ, кој ја одигра веројатно најдобрата четвртина на турнирот. Суперѕвездата на Лос Анџелес Лејкерс постигна неверојатни 22 поени само во првите 10 минути, а Словенија поведе со убедливи 29:11.

Нивната предност во еден момент достигна и 19 поени, а во последната четвртина влегоа со солидни +16. Италијанците се разбудија дури во финишот,  Данило Галинари се појави „од никаде“, а Николо Мели погоди важна тројка за да ја намали разликата на само пет поени.

Ситуацијата стануваше сè понапната, Италија се доближи и на само еден поен разлика, но токму тогаш Словенците покажаа карактер. Во последните две минути одиграа одлична одбрана и не дозволија целосен пресврт, зачувувајќи ја победата која ја градеше Дончиќ уште од самиот старт.

Најзаслужен за триумфот, се разбира, беше Лука Дончиќ со фантастични 42 поени и 10 скокови, додека Клемен Препелич додаде 11. Кај Италијанците, најрасположен беше Симоне Фонтекио со 22 поени.

Словенија во четвртфиналето ќе се сретне со актуелниот светски првак – селекцијата на Германија. Очекувањата се големи, а со Дончиќ во ваква форма – Словенија има право да сонува.