Фудбалската репрезентација на Англија одигра перфектен натпревар во Белград и ја декласираше Србија со високи 0-5, нанесувајќи ѝ еден од најтешките порази на домашен терен во историјата.

Англичаните доминираа од првата до последната минута и апсолутно заслужено си заминаа со убедлив триумф од српската престолнина.

Серијата голови ја отвори Хари Кејн во 32. минута, а само четири минути подоцна Нони Мадуеке погоди за 0-2, резултат со кој се замина на пауза.

Во второто полувреме, гостите не застанаа. Конса во 52. минута погоди за 0-3, а надежите на Србија целосно згаснаа во 72. минута кога Миленковиќ доби директен црвен картон.

Само три минути подоцна Марк Гуехи го зголеми водството на 0-4, а конечниот резултат го постави Маркус Рашфорд од белата точка во самиот финиш на натпреварот.

Тежок пораз за „орлите“, а голем показател за моќта на Англија која уште еднаш потврди зошто е меѓу главните фаворити на европската сцена.