„Црвено-белите“ со победата од 82:78 над Будуќност поведоа со 1:0 во финалето на АБА лигата лигата.
Кошаркарите на Црвена звезда водеа во најголем дел од натпреварот, на средина од последната четвртина имаа предност од дури 15 поени, но Будуќност успеа да се врати и финишот да го направи супер неивесен, доаѓајќи на минус два на 27 секунди до крајот. Сепак, Лојд погоди од линијата за слободни фрлања и ѝ донесе водство во финалната серија на Црвена звезда.

Во редовите на „црвено-белите“ блескаше Добриќ со 23 поени и беше клучен играч во моментите кога неговиот тим ја правеше предноста. 23 поени постигна и Лојд, а Давидовац застана на 12 поени, додека кај Будуќност најрасположени за игра беа Вили Рид со 26 поени  и Никола Ивановиќ со 16 поени од кои дури 11 даде во последната четвртина.
Наредниот натпревар ќе се игра во вторник, а победник ќе биде тимот кој прв ќе дојде до три победи.