Менаџерот на Челси, Енцо Мареска потроши многу енергија и зборови објаснувајќи ѝ на јавноста зошто Николас Џексон е стартен напаѓач, а по малото лондонско дерби со Вест хем можеше да се радува бидејќи репрезентативецот на Сенегал со два брзи гола и асистенција до Кол Палмер донесе три бода во Премиер лигата за победа од 3:0 (2:0).

Цели три години Челси не славеше на гостувањето кај Вест хем, но денеска беше повеќе од ефикасен бидејќи во првото полувреме реализираше две од трите шанси. Веќе во четвртата минута Џексон доби одлично додавање во просторот од Санчо, стигна до голот и го матираше Ареола.

„Сините“ добро ја искористија брзината на Џексон пред Мавропанос и Килман, со серија додавања отворија простор за додавање на Кајсед во просторот. Џексон уште еднаш беше побрз од својот ривал и повторно рутински го зголеми водството.

Конечниот епилог го постави Палмер на стартот од второто полувреме во 47 минута од средбата.

Челси моментно е на второто место со 10 бодови, додека Вест хем е на 14 место со четири бодови.